काठमाडौं । नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले आगामी चैत्र २८ र २९ गते हुने ५७औँ वार्षिक साधारणसभामा सर्वसम्मत नेतृत्व निर्वाचित गर्ने पहल सुरु गरेका छन् ।
महासंघको वरिष्ठ उपाध्यक्षमा तीनजना आकांक्षीहरु रहेका छन् । ढकाल आगामी साधारणसभाबाट स्वतः अध्यक्ष बन्दै छन् ।
बुधबार काठमाडौंको लाजिम्पाटस्थित होटल ले हिमालयमा वरिष्ठ उपाध्यक्षका तीनजना आकांक्षीहरु उमेशलाल श्रेष्ठ, रामचन्द्र संघई र अञ्जन श्रेष्ठलाई एकै ठाउँमा राखेर ढकालले सर्वसम्मत नेतृत्वको पहल गरेका हुन् ।
“महासंघलाई सबै उद्योगी व्यवसायीहरुको साझा प्लेटफर्म बनाउनुपर्छ भन्ने मेरो धारणा हो । त्यसैले मैले महासंघमा सकेसम्म सर्वसम्मत नेतृत्व निर्वाचित गर्ने परम्परा बसालौँ भन्ने गरेको छु,” उनले भनेका छन्,
“यसै शिलशिलामा महासंघका सातवटै प्रदेशको निर्वाचन सकिएको छ । र, सबै प्रदेशमा अधिकांश पदहरुमा सर्वसम्मत नेतृत्व निर्वाचित पनि भएका छन् । यसले महासंघमा राम्रो संस्कारको पनि विकास गरेको छ । महासंघको केन्द्रको नेतृत्व पनि सर्वसम्मत हुनुपर्छ भनेर मैले पहल गरेको हो ।”
अहिले मुलुकको अर्थतन्त्र र व्यवसायीहरु समस्यामा रहेको बताउँदै यस्तो अवस्थामा निजी क्षेत्रबीच एकता र सहमतिको झनै ठूलो महत्व रहने उनले बताए ।
“हामी एक भयौँ भने मात्र निजी क्षेत्र बलियो हुन्छ । हाम्रो महत्व बढ्छ,” उनले भने, “हाम्रा माग सम्बोधन गराउन सकिन्छ । अहिलेको अवस्थामा झन् हामी एक हुनुको विकल्प छैन ।”
निजी क्षेत्रलाई चौतर्फी संकटले घेरिरहेको अवस्थामा विभाजित नभएर एकता र सहकार्यबाट समाधान खोज्न उनले आग्रह गरेका छन् ।
“मैले त अहिलेको विधानमा रहेको तीनवर्षे कार्यकालको व्यवस्थालाई दुई वर्षमा झारेर अहिलेको दुई कार्यकालमै तीनैजना आकांक्षीहरुलाई मिलाउन सकिन्छ भनिरहेको छु,” उनले भने, “यसमा तपाईँहरुको साथ र सहयोगको अपेक्षा गरेको छु ।”