नुवाकोट । बागमती प्रदेशको पर्यटन क्षेत्रको प्रचारका लागि पत्रकारहरूको भ्रमण सुरु भएको छ । पर्यटन उद्योग तथा सहकारी मन्त्रालय बागमती प्रदेशले पत्रकार महासंघ बागमती प्रदेश सँगको समन्वयमा उक्त कार्यक्रमको आयोजना गरेको हो । “घुमफिर वर्ष २०७९/८० सफल पारौँ” भन्ने मूल नाराका साथ भ्रमण कार्यक्रम आयोजना गरेको मन्त्रालयले जनाएको छ ।
भ्रमणको पहिलो दिनको अवसरमा टोलीले चित्लाङको पर्यटन व्यवसायीहरू सँग भेटघाट गरेको छ । कार्यक्रमका अवसरमा मकवानपुर जिल्लाको थाहा नगरपालिका स्थित चित्लाङमा पर्यटन प्रवर्द्धनका लागि भए गरेका प्रयासहरूको बारेमा र आगामी दिनमा गर्नु पर्ने कार्यक्रमका बारेमा अन्तरक्रिया गरिएको थियो ।
नेपालमै पहिलो पटक बाख्राको दूध बाट चिज उत्पादन चित्लाङमै गरिएको भए पनि यसको थप प्रवर्द्धन गर्न राज्य बाट कुनै सहयोग नभएको चिज उत्पादक अशोक सिं ठकुरी ले गुनासो गरे । चित्लाङलाई महत्त्वपूर्ण पर्यटकीय क्षेत्रको रूपमा विकास गर्न सकिने सम्भावना हुँदा पनि सरकारले पर्याप्त सहयोग नगरेकोले अहिले सम्म यो ठाउँ ओझेलमा परेको पर्यटन व्यवसायीहरूले बताएका थिए ।
अन्तरक्रियात्मक कार्यक्रममा मन्त्रालयको तर्फबाट सहभागीहरूले यस ठाउँको थप पर्यटन प्रवर्द्धनमा आ आफ्नो क्षेत्र वाट सहयोग गर्ने प्रतिबद्धता जनाए ।
टोलीमा मन्त्रालयको तर्फबाट अधिकृतहरू, किशोर सापकोटा र रमेश पौडेल पत्रकार महासंघ बागमती प्रदेशका अध्यक्ष शिव देवकोटा सहितका पत्रकारहरू गरी २५ जनाको सहभागिता रहेको छ । टोलीले मकवानपुर, नुवाकोट, धादिङ र रसुवा जिल्लाका विभिन्न पर्यटन क्षेत्रको अवलोकन गरी प्रचार प्रसार गर्ने कार्यक्रम रहेको छ ।