रामेछाप । रामेछाप नगरपालिकाले नीति तथा कार्यक्रम निर्माणका लागि पत्रकारसँग मेयर कार्यक्रम सम्पन्न गरेको छ । आर्थिक वर्ष २०८१/८२ को नीति तथा कार्यक्रम निर्माणका लागि विभिन्न सरोकारवाला तथा राजनीतिक दलहरू सँग सुझाव लिई पत्रकारहरूसँग सुझाव लिन कार्यक्रमको आयोजना गरिएको रामेछाप नगरपालिकाका सूचना अधिकारी होम बहादुर प्रष्ट पारे ।
आगामी आर्थिक वर्षको नीति तथा कार्यक्रममा नगरका विकासका लागी एसियाकै सबै भन्दा अग्लो बुद्धको मूर्ति स्थापना गरी स्थानीय पर्यटन प्रवर्द्धनमा फड्को मार्ने नगर प्रमुख लवश्री न्यौपानेले बताए । आर्थिक वर्ष २०८१/०८२ मा शैक्षिक सुधारका लागि मेघा विद्यालयको स्थापना गरी शैक्षिक क्षेत्रमा सुधार गर्ने न्यौपानेले बताए । व्यावसायिक कृषि प्रवर्द्धन , लिफ्ट खानेपानी तथा स्वास्थ्य क्षेत्रमा विशेष महत्वका साथ काम गरिने प्रमुख न्यौपानेले बताए ।
कार्यक्रमका अवसरमा पत्रकारहरूले बन डढेलोले जिल्लाको सबैभन्दा बढी क्षति हुने नगरपालिकाको रूपमा रहेको रामेछाप नगरपालिकाले आवश्यक योजना बनाउन र रैथाने कृषि बालीहरूको संरक्षण गर्न आग्रह गरेका थिए । नगरको नीति तथा कार्यक्रममा समावेश गर्नुपर्ने शिक्षा, स्वास्थ्य, खानेपानी, भौतिक पूर्वाधार, रोजगार प्रवर्द्धन, सञ्चार क्षेत्रको विकासका लागि उपयुक्त कार्यक्रम सञ्चालन तथा शैक्षिक सुधारका कार्यक्रम ल्याउन सुझाव दिएका थिए । रामेछापमा पर्यटन पूर्वाधारको विकासमा नगरपालिकाले आवश्यक योजना बनाउनु पर्ने पनि सुझाव दिएका थिए ।
करिब २ वर्षको अवधिमा नगरले गरेका राम्रा कामहरूको प्रचार प्रसार र स्थानीय उत्पादनलाई बजार सँग जोड्नका लागि पत्रकारहरूको महत्त्वपूर्ण भूमिका भएकाले नगर उप–प्रमुख बालकुमारी कार्कीले बताइन् ।
पत्रकारहरूले सामूहिक रूपमा आएर मिडिया हाउसको विकासका बारेमा एकद्वार बजेट माग गरे सहजता हुने र पालिकाले त्यसको सम्बोधन गर्ने नगरका प्रमुख प्रशासकीय अधिकृत मित्रप्रसाद घिमिरेले बताए ।
कार्यक्रममा नेपाल पत्रकार महासङ्घका अध्यक्ष बद्री नयाँघरेले जिल्लाका मिडियाहरूको संस्थागत विकास गर्न अन्य पालिकाहरू भन्दा अग्रपङ्क्तिमा रहेर सहयोग गर्न आग्रह गरे । उनले नगरलाई उत्पादनसँग जोड्न समेत आग्रह गरे ।