काठमाडौं । प्रेस चौतारी नेपालका अध्यक्ष गणेश बस्नेतले विद्युतीय अपराध (साइबर क्राइम) को मुद्दामा सफाइ पाएका छन् । काठमाडौं जिल्ला अदालतका न्यायाधीश हर्कबहादुर क्षेत्रीको बुधबारको इजलासले अभियोग दाबी नपुग्ने भन्दै बस्नेतलाई सफाइ दिएको हो ।
वरिष्ठ अधिवक्ता बाबुराम दाहाल, वरिष्ठ अधिवक्ता रामबहादुर खड्का, अधिवक्ताहरू रामचन्द्र पौडेल, योगेन्द्रबहादुर थापा, चेतबहादुर थापालगायत बस्नेतको पक्षबाट बहस गरेका थिए। सञ्चारमाध्यममा प्रकाशित समाचारको विषयलाई साइबर अपराध भन्न नमिल्ने र यसको क्षेत्राधिकार प्रेस काउन्सिल रहेको अदालतको व्याख्या रहेको बस्नेतको तर्फबाट बहस गरेका अधिवक्ता हरिप्रसाद पंगेनीले जानकारी दिए ।
‘राजनीतिक पूर्वाग्रह साँध्न मात्र क्षेत्राधिकार भन्दा बाहिर गएर मुद्दा लगाइएको देखियो’, पंगेनीले भने । बस्नेत अध्यक्ष रहेको जनता टाइम्स अनलाइमा प्रकाशित समाचारको विषयलाई लिएर उनीमाथि मुद्दा चलाइएको थियो । अर्का प्रतिवादी गणेश विकलाई भने पछि सजाय निर्धारण हुने गरी कसुरदार ठहर्याइएको छ ।