ढाका । दक्षिणपूर्वी बंगलादेशको एक निजी रासायनिक कन्टेनर डिपोमा शनिबार राति भएको भीषण आगलागीमा परी कम्तीमा ४० जनाको मृत्यु हुनुका साथै ४५० भन्दा बढी घाइते भएका छन्। अधिकारीहरूले आइतबार सो जानकारी दिएका हुन्।
चटगाउँको सीताकुण्ड उपजिल्लाको कदमरासुल क्षेत्रमा रहेको बीएम कन्टेनर डिपोमा शनिबार राति आगलागी भएको हो।
‘अहिलेसम्म ४० वटा शव शवगृहमा सारिएको छ’, चटगाउँ मेडिकल कलेज अस्पताल ९सीएमसीएच० मा तैनाथ एक प्रहरी अधिकारीले पत्रकारहरूलाई भने। ‘रेड क्रिसेन्ट युथ चटगाउँ’का स्वास्थ्य तथा सेवा विभागका प्रमुख इस्ताकुल इस्लामलाई उद्धृत गर्दै ‘ढाका ट्रिब्युन’ ले भन्यो, ‘यो घटनामा ४५० भन्दा बढी घाइते भएका छन्, तीमध्ये कम्तीमा ३५० जनालाई चटगाउँ मेडिकल कलेजमा राखिएको छ।
इस्लामले मृत्यु हुनेको संख्या बढ्न सक्ने आशंका व्यक्त गरे। ‘द डेली स्टार’ अखबारका अनुसार चटगाउँका जिल्ला कमिशनर अशरफुद्दिनले मृतकका परिवारलाई ५० हजार टका र २० हजार टका सहायता दिइने बताए।
प्रधानमन्त्री शेख हसिनाले उक्त घटनाप्रति दुःख व्यक्त गरेकी छन्। घटनाको छानबिन गर्न अधिकारीले उच्चस्तरीय छानबिन समिति गठन गरी आगामी तीन दिनभित्र प्रतिवेदन बुझाउन आदेश दिएका छन्।
शनिबार राति करिब ९ बजे कन्टेनर डिपोमा आगलागी भएको सीएमसीएच प्रहरीचौकीका प्रहरी नायब निरीक्षक नुरुल आलमले बताए।
दमकलले आगो निभाइरहेका वेला पुनः विस्फोट भएपछि आगो फेरि फैलिएको थियो। कन्टेनर डिपोमा रहेको रसायनका कारण आगलागी भएको हुन सक्ने नुरुलले बताए।
उनले राति १२स्४५ बजे ठूलो विस्फोट भएको र एउटा कन्टेनरमा रहेको रसायनका कारण आगो अर्को कन्टेनरमा फैलिएको बताए।
यो सम्बन्धमा एक प्रत्यक्षदर्शीका अनुसार आगलागी भएपछि दमकल, प्रहरी र अन्य उद्धारकर्ता घटनास्थलमा पुगेको बताए। त्यसपछि एकपछि अर्को कन्टेनरमा विस्फोट हुँदा उनीहरूको मृत्यु भएको हो।
विस्फोटका कारण घटनास्थल वरपरका घरका झ्यालका सिसा फुटेका छन्।
सीताकुण्ड इलाकामा भएको घटनास्थलमा पत्रकारहरुसँग कुरा गर्दै दमकलका प्रमुख ब्रिगेडियर जनरल मोहम्मद मैनुद्दिनले भने, ‘डिपोमा रहेको कन्टेनरमा हाइड्रोजन पेरोक्साइड जस्ता विभिन्न प्रकारका केमिकल राखिएको थियो र तिनै रसायनका कारण आगलागी भएको देखिन्छ।’
बीएम कन्टेनर डिपोका निर्देशक मुजिबुर रहमानले आगलागीको कारण थाहा नभए पनि कन्टेनरबाट आगो फैलिएको दाबी गरे। रहमानले डिपोमा करिब ६०० जनाले काम गर्ने बताए। बंगलादेशमा बारम्बार आगलागीका घटना भइरहेका छन्।
‘द डेली स्टार’ले रहमानलाई उद्धृत गर्दै भनेको छ, ‘घाइतेहरूको राम्रो उपचार गरिने सुनिश्चित गर्छौँ। उपचारको सबै खर्च हामीले व्यहोर्ने छौँ। दुर्घटनामा घाइते भएकालाई अधिकतम क्षतिपूर्ति दिइनेछ। हामी सबै पीडित परिवारको जिम्मेवारी लिनेछौं।’
दमकल सेवाका अनुसार त्यस क्रममा दमकल विभागका तीन कर्मचारीको पनि मृत्यु भएको छ। मृतकको परिचय खुल्न बाँकी छ।
गत वर्ष देशको दक्षिणमा एउटा डुङ्गामा आगलागी हुँदा कम्तीमा ३९ जनाको मृत्यु भएको थियो। गत वर्ष ढाका नजिकको रूपगञ्जमा रहेको एउटा कारखानामा आगलागी हुँदा ५२ जनाको मृत्यु भएको थियो। सन् २०२० मा तेल ट्याङ्कीमा विस्फोट हुँदा तीनजनाको ज्यान गएको थियो।