तातोपानी । सिन्धुपाल्चोकको तातोपानी नाका सोमबार (आज) देखि दुईतर्फी रुपमा सञ्चालनमा आएको छ ।
आठ वर्षपछि तातोपानी नाका सञ्चालनमा आएको हो । पूर्ण रुपमा सञ्चालनमा ल्याउने तयारी स्वरुप सोमबारदेखि दुईतर्फी आयात निर्यात सुरु भएको हो ।
सोमबार बिहान नेपालबाट २९ लाख २९ हजार ८ सय ११ रुपैयाँ बराबरको तीन ट्रक मुडा र म्याट्रेस चीनतर्फ निर्यात भएको तातोपानी भन्सार कार्यालयका प्रमुख दयानन्द केसीले जानकारी दिए ।
गत महिना नेपाली र चिनियाँ अधिकारीहरूबीच ल्हासामा भएको बैठकपछि नाका भूकम्पअघिकै अवस्थामा सञ्चालन गर्ने सहमति भएअनुसार सोमबारदेखि नेपाल र चीन दुवैतर्फबाट आयात निर्यात खुला भएको हो ।
यसैबीच भूकम्पपछि बन्द भएको उत्तरी चीनसंग जाेडिएका अन्य नाकाहरू पनि आजदेखि खुला भएको उद्योग, वाणिज्य तथा आपूर्ति मन्त्रालयले जनाएको छ।
चीनतर्फका नाकाहरूमा हुम्लाको यारी, मुस्ताङको कोरला, सङ्खुवासभाको किमाथाङ्का, ताप्लेजुङको ओलाङचुङ्गोला रहेका छन्। मुगुको न्याङ्चे, दार्चुलाको व्यास, गोरखाको चुम्नी र डोल्पाको उत्तरी नाकासमेत खुला भएका छन्। चीनतर्फका व्यापारिक नाका रसुवाको केरुङ, कोदारी र हुम्लाको यारी नाकाबाट आयात निर्यात धेरै हुने गरेको छ।
यसैगरी तातोपानी नाका मजदुर दिवसमा चीनमा पाँच दिन विदा परेको र नेपालतर्फको अध्यागमन कार्यालयमा कर्मचारी व्यवस्थापनमा समय लागेकोले मानव आवतजावतका लागि भने अझ केही समय लाग्ने जनाइएको छ । साेही क्रममा सिन्धुपाल्चोक १ बाट प्रतिनिधि सभा सदस्य माधव सापकोटा ‘सुबोध’ले कुटनीतिक पहलकदमीले नाका दोहोरो सुचारु भएको र छिट्टै मानव आवतजावत पनि सुरु हुने जानकारी दिएका छन् ।