सिन्धुपाल्चोक । जिल्लाको लिसंखु पाखर गाउँपालिकाले आगामी आर्थिक वर्षका लागि ५१ करोड ९६ लाखको बजेट प्रस्तुत गरेको छ । आइतबार बसेको १३ औं गाउँसभामा गाउँपालिका प्रमुख राजु लामाले आगामी आर्थिक बर्षको नीति तथा कार्यक्रम र बजेट प्रस्तुत गरेका हुन् ।
बजेट वक्तव्य भने उपाध्यक्ष मिठु देवि लामाले प्रस्तुत गरेकी थिइन् । उपाध्यक्ष लामाले आगामी आर्थिक वर्ष २०८०/८१ को लागि चालु तर्फ ३२ करोड ४९ लाख ८५ हजार ५ सय, ( ६७.१५ प्रतिशत ) र पुँजीगत तर्फ १८ करोड ८६ लाख ९८ हजार ८०५ (३२.९५ प्रतिशत) बजेट पेश गरेकी हुन् । सभाले नीति तथा कार्यक्रम र सो बजेट पारित गरेको छ ।
कार्यक्रममा गाउँ पालिका अध्यक्ष एवं सभाका अध्यक्ष राजु लामाले मुडेको आलु ‘ब्राण्डिङ’ गर्ने र यस बर्ष लगानी सम्मेलन गर्ने बताए । सभाका सदस्य सचिव एवं गाउँ पालिकाका प्रमुख प्रशासकीय अधिकृत मंगल बहादुर बिष्टले सभाको आचारसंहिता जानकारी गराएका थिए । लिसंखु पाखरको यस वर्षको बजेट नीति तथा कार्यक्रमले विशेष गरी गुणस्तरीय शिक्षा, स्वास्थ्य, कृषिको व्यवसायीकरण, आधुनिकिकरण, बजारीकरण, रोजगारीको सृजना, स्वरोजगार र उधमशिलताको विकासमा जोड दिएको छ । यस्तै सामाजिक सुरक्षा र संरक्षण, महिला तथा बालबालिकाको शसक्तिकरण, लैंगीक समानता तथा गाउँपालिकाको सर्वाङर्गीण विकास र समृद्दीका विषय समेटिएका छन् ।
आगामी वर्षको मुख्य कार्यक्रमहरुमा सहिद तथा वेपता योद्धाका परिवार र दन्द्ध पीडित व्यक्तिको सामाजिक उत्थान र सम्मान कार्यक्रम, अध्यक्ष शैक्षिक सुधार कार्यक्रम, गाउँपालिकासंग जनता रेडियो कार्यक्रम, डिजिटल गाउँपालिका निर्माण अभियान, वित्तिय सुशासन अभियान, पढ्दै कमाउदै कार्यक्रम, लगानी सम्मेलन, गाउँपालिकासंग किसान कार्यक्रम रहेका छन् । यस्तै पालिकाले चुलिडाडा जिपलाइन सम्भावना अध्ययन गर्ने भएको छ भने कम्तिमा ३ वटा ‘नमुना समाजवादी गाउँ र टोल’ निर्माण गर्ने जनाएको छ ।
त्यस्तै, गाउँपालिकले सभाबाट राम्रो काम गर्ने ५ वटा उपभोक्ता समितिलाई सम्मान गरेको थियो ।