रामेछाप । सुख्खायाम सुरु भएको करिब दुई महिनाको अवधिमा रामेछाप जिल्लाका सामुदायिक वनमा आगलागीका घटनामा वृद्धि हुँदै गएको छ । आगलागीका कारण जङ्गल वरिपरि क्षेत्रका बासिन्दामा दिनहँु त्रसित बन्दै गएका छन् । यही त्रासका कारण स्थानीय रातमा पनि चैनसँग निदाउन सक्दैनन् ।
डिभिजन वन कार्यालय रामेछापले दिएको जानकारीअनुसार जिल्लामा यो सुख्खायाममा करिब चार सय हेक्टर क्षेत्रफलमा डढेलो लागिसकेको छ । दिनहुँजसो हुने आगलागीका घटनाले मानिसलाई आतङ्कित बनाउन थालेको छ । कहिले दिनमा त कहिले रातमा हुने गरेका आगलागीका घटनाले जङ्गल छेउछाउका स्थानीय बासिन्दा रातको समयमा पालो गरी सुत्नुपर्ने बनेको छ । रातमा सुतिरहेको अवस्थामा कहीँ कतैबाट गाउँमा आगो आउँछ कि भनेर मानिसमा त्रासैत्रासमा रात गुजार्ने गर्दछन् ।
जब गर्मी मौसम सुरु हुन्छ तब यस्ता आगलागीका घटना बढ्दै जाने गर्दछन् । जङ्गलमा आगो लगाएपछि राम्रोसँग घाँस पलाउने आश, आगोले जङ्गलमा रहेका काठ दाउरा सुक्ने हुँदा घाँस तथा दाउराको लोभमा वनमा डढेलो लगाउने गरेको पाईएको छ ।
डिभिजन वन कार्यालय रामेछापका सुचना अधिकारी देवेन्द्र यादवका अनुसार आगलागीबाट यस वर्ष जिल्लामा एक जनाले ज्यान गुमाई सकेको छ भने तीस भन्दा बढी घर–गोठ जलेर नष्ट भएका छन् । आगलागीले जंगल र बस्ती सखाप बनाउँदा करोडौं क्षति भएको छ ।
आगो लागाउने व्यक्तिलाई कडा सजायको व्यवस्था भए पनि आगो कसले लगाएको हो भन्ने बारेमा कुनै जानकारी प्राप्त नभएका कारण कतिपय घटनामा आवश्यक कानुनी कारबाही प्रक्रियाअघि बढाउन नसकिएको डिभिजन वन अधिकृत ओमसागर भण्डारी बताउँछन् ।
आगलागीका कारण स्थानीयवासीलाई मात्र नभई जिल्लास्थित सुरक्षाकर्मीलाई हैरानी थपिएको छ । आगलागीको जानकारी पाएपछि प्रहरी र नेपाली सेना आगो नियन्त्रणका लागि घटनास्थलमा पुगेर आगो निभाउने काममा सक्रिय बनेका हुन्छन् । यसले स्थानीयवासीलाई जोखिमबाट जोगाउनेमा थप मद्दत मिलेको छ ।
जिल्लाका विभिन्न सामुदायिक जङ्गलमा अहिले पनि डढेलो लागिरहेको छ । डढेलो नियन्त्रणमा सुरक्षाकर्मीबाहेक स्थानीयमा अघिल्लो वर्षतीरको भन्दा कम चासो देखिएको छ । -गन्तव्य टुडे