भक्तपुर – भक्तपुरको सल्लाघारीमा रूख ढलेर च्याप्दा तीनजनाको मृत्यु भएको छ । घटनामा परी एक दर्जन भन्दा बढी घाइते भएको अनुमान छ।
रुख ढलेर सडकमा गुडिरहेको यात्रुवाहक गाडीमा लागेर च्याप्दा गाडीमा रहेका दुई जनाको मृत्यु भएको हो। साथै स्कुटरमाथि च्याप्दा स्कुटरमा बसेका एक जनाको मृत्यु भएको हो।
ट्राफिक प्रहरी कार्यालय सल्लाघारी भक्तपुरका प्रमुख राजु कार्कीले घटनामा परेर तीनजनाको मृत्यु र एक दर्जन भन्दा बढी घाइते भएका छन् । उनका अनुसार मृतक र घाइतेहरुको नाम आउन बाँकी नै छ।
काठमाडौंबाट भक्तपुर आइरहेको बा २ ख ३५८४ नम्बर को मिनिबस र बा ६१ प ३९७८ को स्कुटरलाई ढलेको रुखले किचेको उनले बताए। उनका अनुसार गाडीमा सबै गरेर दुई दर्जनको संख्यामा यात्रुहरू थिए।
पछाडिको भागमा किचिएकाले गाडीका चालक र सहचालक भने सकुशल रहेका उनले जनाए। घटनाबारे विस्तृत विवरण आउन बाँकी नै छ। घटना दिउँसो १२ बजेतिर भएको बताइएको छ।