सिन्धुपाल्चोक । संघीय राजधानी काठमाडौंबाट सबैभन्दा नजिक रहेको जुगल हिमाल अन्तर्गतका आठ हिमालको आधार शिविर नजिक ने(पेमाछाल उपत्यकामा पर्यटन प्रवर्धनका विविध कार्यक्रम गरिएको छ ।
जिल्लाको ऐतिहासिक, धार्मिक एवं पर्यटन प्रवर्धनका जुगल गाउँपालिकाको आयोजनामा शनिबार ने-पेमाछालमा प्रवर्धनात्मक कार्यक्रम गरिएको पालिका अध्यक्ष रेशम स्याङ्वोले बताए ।
ने-पेमाछालमा आयोजित पर्यटन प्रवर्धन कार्यक्रममा निवर्तमान सभामुख अग्निप्रसाद सापकोटा, सिन्धुपाल्चोक १ का प्रतिनिधि सभा सदस्य माधव सापकोटा ‘सुबोध’, बागमती प्रदेश सभा सदस्य सरल सहयात्री, गाउँपालिका अध्यक्ष रेशम स्याङ्बो र उपाध्यक्ष हिमाल कुमार श्रेष्ठलगायत पर्यटन प्रबर्द्धनमा एकजुट हुन हौसला प्रदान गरे ।
ऐतिहासिक, धार्मिक एवं पर्यटकीय महत्वको ने-पेमाछालमा लामा गुरुहरुले पूजा, जिन्लब, डुप्सी ,छेवाङ तथा धार्मिक पर्यटन प्रवर्धनका लागि विधिपूर्वक विविध कार्यक्रम गरेको सिन्धु पर्यटन परिषद्का सचिव मिलम तामाङले जानकारी दिए ।
त्यस्तै कार्यक्रममा सहभागीता जनाउन चार दिन अघि नै हिंडेका आन्तरिक पर्यटक ने-पेमाछालमा जम्मा भएका थिए भने अतिथिहरु भने शनिबार दिउँसो आज काठमाडौंबाट हेलिकोप्टर मार्फत कार्यक्रम स्थल पुगेका थिए ।
थप पाँच चुचुराको आरोहण खुलेपछि थपियो उत्साह
२०७५ सालबाट आरोहण खुल्ला गरिएको जुगल अन्तर्गतका अन्य हिमाल समेत खुल्ला गर्ने सरकारी निर्णयले यस क्षेत्रमा खुसी थपिएको छ । काठमाडौंबाट तीन दिनमै पुग्न सकिने नजिकको गन्तब्यका हिमाल आरोहण खुल्ला गर्ने निर्णयले सिन्धु पर्यटनमा थप टेवा पुग्ने विश्वास सम्वन्धित क्षेत्रका विज्ञहरुको छ । गत चैत २८ गते बसेको मन्त्रिपरिषद्को बैठकले जुगल हिमाल अन्तरगत ‘जुगल १’ देखि ‘जुगल ५’ नामाकरण भएका थप पाँच चुचुरा आरोहण खुल्ला गर्ने र पाँच वर्ष सम्म शुल्क नलिने निर्णय गरेको थियो ।
