सिन्धुपाल्चोक । चौतारा सागाँचोकगढी नगरपालिका ५ नम्बर वडा महिला सञ्जालले महिलालाई सशक्तिकरण गराउन सवारी चालक तालिम सञ्चालन गरेको छ ।
नगरपालिकाको आर्थिक सहयोग र महिला वडा सञ्जालको आयोजनामा सञ्चालन गरिएको यस कार्यक्रमको आईतबार चौतारामा नगर प्रमुख कृष्ण प्रसाद सापकोटाले उद्घाटन गरेका हुन् ।
नगर प्रमुख सापकोटाले तालिम उद्घाटन गर्दै प्रशिक्षार्थीहरूलाई समयसापेक्ष सवारी साधनमा हुने नयाँ प्रविधिको ज्ञानको बारेमा अभ्यास तथा जानकारी दिई अझ योग्य र दक्ष चालकको रुपमा विकास गर्ने लक्ष्य रहेको बताए ।
तालिम लिएर प्रयोगमा आउदैन भने त्यसको औचित्य नहुने बताउदै तालिम लिएपछी रोजगार सगँ जोडिनु आवश्यक रहेको समेत सापकोटाले बताए । यो तालिम संवेदनशिल भएको हुदा ईच्छाशक्तिका साथ जोस जागर देखाएर र विषेश सावधानीका साथ ध्यान दिएर सिक्न आग्रह गरे ।
यस्तै वडा ५ का वडा अध्यक्ष शिव श्रेष्ठले अरु तालिम सिकाई जस्तो नभई एउटा जोखिम मोलेर सिक्नुपर्ने भएकाले सावधानी रुपमा सिक्न सिकाउन आग्रह गरेका छन् ।
२४ जनालाई एक महिने चारपाङ्ग्रे सवारी साधन चालकको तालिम सञ्चालन गरिएको महिला सञ्जालकी अध्यक्ष गंगा घिमिरेले बताईन् । महिलालाई परम्परागत सीपभन्दा अलि फरक प्रविधि र विकाससँग जोडेर तालिम दिइएको उनको भनाइ थियो । महिलालाई व्यवसायिक चालक बनाउने उद्देश्यले २४ महिलालाई एक महिने चारपाङ्ग्रे सवारी साधन चालकको तालिम सञ्चालन गरिएको अध्यक्ष घिमिरेको भनाई छ ।
तालिम विलासिताको लागि नभइ व्यावसायिक चालक बन्न प्रेरित गर्ने उद्देश्यले सञ्चालन गरिएको र यो तालिमले विस्तारै चालक बन्न प्रेरित गर्ने अपेक्षा नगरपालिकाको छ ।
