सिन्धुपाल्चोक । चौतारा साँगाचोकगढी नगरपालिकाले स्थानीय किसानलाई आधुनिक कृषि सामग्री वितरण गरेको छ ।
मेयर कृष्णप्रसाद सापकोटाले नगरपालिकामा आयोजित एक कार्यक्रममा किसानलाई सामग्री हस्तान्तरण गरेका हुन् । नगरपालिकाको ५० प्रतिशत अनुदानमा कृषि सामग्री वितरण गरिएको हो ।
कृषि उत्पादन बढाउने उद्देश्य राखेर ७ सय ५५ थान फरक फरक कृषि सामग्री वितरण गरिएको नगरपालिकाको कृषि शाखाले जनाएको छ ।
शाखाबाट अनुदान कार्यक्रम अन्तर्गत मिनी ट्रिलर ६६ थान, प्लास्टिक टनेल ५ सय ६० थान, ब्याट्री स्प्रेयर १ सय ११ र प्लास्टिक पोखरी १८ गरी जम्मा ७ सय ५५ थान सामग्री वितरण गरिएको हो ।
कृषि सामग्री हस्तान्तरण कार्यक्रमलाई सम्बोधन गर्दै नगरप्रमुख सापकोटाले कृषि उत्पादन बढाउँदै व्यवसायीकरणतर्फ जानु पर्नेमा जोड दिए । उनले यसका लागि वितरित कृषि सामग्री प्रभावकारी हुने विश्वास व्यक्त गरे ।