रामेछाप । मन्थली नगरपालिका प्रमुख लव श्रेष्ठले शिक्षा, स्वास्थ्य, कृषि र पर्यटन लगायतका क्षेत्रलाई प्राथमिकतामा राखेर काम अघि बढिरहेको बताएका छन् ।
नेपाल आदिवासी जनजाति पत्रकार महासङ्घ (फोनिज) को २४ औँ स्थापना दिवसका अवसरमा फोनिज रामेछापले शनिवार मन्थलीमा आयोजना गरेको पत्रकार सम्मान कार्यक्रममा बोल्दै नगरपालिका प्रमुख श्रेष्ठले अन्य क्षेत्रमा भन्दा शिक्षा, स्वास्थ्य, कृषि र पर्यटनलाई प्राथमिकतामा राखेर काम भैरहेको बताएका हुन् ।
नगरपालिकाभित्रका सामुदायिक विद्यालयको पठन पाठनमा गुणस्तर ल्याउने उद्देश्यले प्रतिस्पर्धा मार्फत नगरका ४१ वटा विद्यालयमा प्रधानाध्यापक व्यवस्थापन गरिएको उनले बताए। श्रेष्ठले भने ‘‘यो वर्ष नगरपालिकाले शिक्षा क्षेत्रलाई पहिलो प्राथमिकतामा राखेर काम गरेको छ । भर्खरै शिक्षा क्षेत्रको विकासका लागि एउटा विधि बनाएर प्रतिस्पर्धात्मक रूपमा ४१ वटा विद्यालयमा प्रधानाध्यापक व्यवस्थापन गरिएको छ । यसबाट सुधार हुन्छ भन्ने हामीले विश्वास लिएका छौँ ।’’
विधिवत् रूपमा प्रधानाध्यापकको व्यवस्थापन भएपछि विद्यालयको पठन पाठन सुधार भएको छ कि छैन यसमा निगरानी गरी आवश्यक सुझाव दिन उनले जिल्लाका सञ्चार जगत् लाई पनि आग्रह गरे ।
नगरप्रमुख श्रेष्ठले विगतमा के भयो के भएन भन्ने कुरा वास्ता नगरी अब मन्थली नगरपालिकाबाट प्रसारण तथा प्रकाशन हुने सूचना सामाग्रीहरू प्रकाशन तथा प्रसारण गर्न स्थानीय सञ्चार माध्यमलाई प्राथमिकता दिइने समेत बताए ।