सिन्धुपाल्चोक । जापानका महामहिम राजदूत युताका किकुताले जापानले नेपालको ग्रामीण क्षेत्रको विकासमा गरेको सहयोगले जापान र नेपालको मैत्रीपूर्ण सम्बन्धलाई अझै मजबूत बनाउने बताएका छन् ।
जिल्लाको बलेफी गाउपालिका वडा नं. ४ डाडा गाउमा जापान सरकारको सहयोगमा सम्पन्न खानेपानीको आयोजनाको उद्घाटन तथा हस्तान्तरण समारोहमा राजदूत किकुताले यस्तो बताएका हुन् ।
बस्ती माथि पानीको मुहान नहुँदा गाउँदेखि झण्डै एक किलोमिटर तल थारथान खोलाबाट पानीलाई लिफ्टीङ गरि दशकौँदेखि खानेपानीको अभाव झेल्दै आएको डाँडागाउँमा १ सय ३८ घरसहित ५ स्थानमा सार्वजनिक गरि १४३ स्थानमा धारा निर्माण गरि सो क्षेत्रका स्थानीयको समस्या जापान सरकारले पुरा गरिदिएको छ । राजदूत किकुताले नेपालका लागि यस्ता विकास कार्यक्रमहरु जापान सरकार तथा जापानी जनताको तर्फबाट नेपाली जनताको लागि उपहार भएको बताए ।
जापानी राजदूत किकुताले जापानले दोस्रो विश्व युद्धमा ध्वस्त भएपछि सहकार्य र समन्वयको बाटो रोजेको र जापानको सोही नीति अनुसार नेपालमा यस्ता आयोजना सन्चालन गर्न सहयोग गर्दै आएको उल्लेख गरे । साथै उनले सिन्धुपाल्चोकका विभिन्न ठाउमा खानेपानी आयोजना र तरकारी उत्पादन एवं बजारीकरण मार्फत ग्रामीण कृषहरुको आम्दानी वृद्धि सम्बन्धी आयोजना सफलता पूर्वक सम्पन्न गरेकोमा Peace Winds Japan (PWJ) र सम्बृद्धिका लागि यथायोग्य कार्य संस्था(आइस्याप) को टिमलाई धन्यवाद दिए ।
सोही उद्घाटन तथा हस्तान्तरण कार्यक्रममा बोल्दै प्रतिनिधि सभा सदस्य माधव सापकोटाले जापान सरकारले सिन्धुपाल्चोक जिल्लामा खानेपानी आयोजना सन्चालन र कृषि उत्पादन एवं बजारीकरण मार्फत आयआर्जनमा वृद्धि जस्ता कार्यक्रम उपहारको रुपमा दिएकोले अब यी आयोजनाहरु सम्पन्न भए पश्चात नेपाल सरकारले जिम्मालिई दिगो रुपमा सन्चालन गर्ने बताए । जिल्लामा जापान सरकारले गरेको सहयोगको लागि उनले जापानी राजदूतलाई धन्यवाद दिए ।
जापान सरकारको सहयोगमा सिन्धुपाल्चोकमा सन्चालित“खानेपानी पहुँच तथा कृषिआय सुधार आयोजना” (PIWAAI) का टिम लिडर एवं कृषि विज्ञ डा. रामचन्द्र भुसालले २०७२ सालको भुकम्प पश्चात जापानको परराष्ट्रमन्त्रालय र जाइका (JICA) को सहयोगमा Peace Winds Japan (PWJ) र सम्बृद्धिका लागि यथायोग्य कार्य संस्था (आइस्याप) ले विभिन्न आयोजनाहरु सन्चालन गर्दै आएको र जापानको सहयोगमा सन्चालित आयोजनाको प्रभाव समुदायमा अत्यन्त राम्रो रहेको बताए ।
साथै सम्पन्न सबै आयोजनाहरु सम्बन्धित उपभोक्ता समूह र स्थानीयतहलाई हस्तान्तरण गरिएकोले आयोजनाहरुको संरक्षण एवं दिगो रुपमा सन्चालनको लागि स्थानीयतह र उपभोक्ता समितिहरुलाई अनुरोध गरे ।
आइस्यापका कार्यकारी निर्देशक अपेक्षा भुसालले जापान सरकारको सहयोगमा सिन्धुपाल्चोकमा हाल सम्म १९ वटा खानेपानी आयोजना सम्पन्न गरी “एक घर एक धारा” कार्यक्रमअन्तर्गत ६७३ खानेपानी धारा, ४६० प्लाष्टिक घर, २ वटा कृषि उपज संकलन केन्द्र निर्माण गरी खानेपानीतर्फ ८२४ र कृषितर्फ १३१३ घर धुरी लाभान्वित भएको जानकारी बताईन् । कार्यक्रम सन्चालन गर्दा स्थानीयतह र समुदायबाट प्राप्त सहयोगको लागि उनले आभार प्रकट गरिन् ।
कार्यक्रममा Peace Winds Japan (PWJ)को मुख्य कार्यालयका प्रतिनिधि आइस्यापका अध्यक्ष शान्ति लक्ष्मी शाक्य, बलेफी तथा सुनकोशी गाउपािलकाका जनप्रतिनिधिहरु र कृषक जनप्रतिनिधिहरुले समेत आ–आफ्नो धारणा राख्दै जापान सरकार र आयोजना कार्यान्वयन गर्ने संस्था Peace Winds Japan र आइस्यापलाई धन्यवाद व्यक्त गरे ।
जापानको सहयोगमा विगत ७ वर्ष देखि सिन्धुपाल्चोकमा सन्चालित खानेपानी आपूर्ति कृषि उत्पादन र बजारीकरण मार्फत आयआर्जनमा वृद्धि, महामारी नियन्त्रण एवं राहत कार्यक्रम वितरण जस्ता आयोजनाहरु २०८० सालभदौ बाट समाप्त हुने भएकोले सोको जानकारी स्थानीयतह, उपभोक्ता समूह र कृषक एवं स्थानीय समुदायलाई गराउनको लागि आयोजना समापन समारोह समेत गरिएको थियो । खानेपानी आयोजना उद्घाटन,हस्तान्तरण र समापन समारोहको अध्यक्षता वलेफी गाउपालिकाका अध्यक्ष गंगावहादूर तामाङले गरेका थिए ।
