काठमाडौं । उपप्रधान एवं गृहमन्त्री रवि लामिछानेले जिम्मेवारी सम्हालेको १०० दिनका उपलब्धी विवरण सार्वजनिक गरेका छन् । रविले फागुन २३ गतेबाट दोस्रो पटक गृह मन्त्रालय सम्हालेका थिए । दोस्रो पटक गृह मन्त्रालय सम्हाल्दाका १०० दिनमा सात क्षेत्रमा ७८ बुँदे उपलब्धी भएको दाबी गर्दै निजी सचिवालयमार्फत विवरण सार्वजनिक गरेका हुन् ।
गृहमन्त्री लामिछानेले आफ्नो १०० दिनको कार्यकालमा २४१ जना व्यक्तिगत सुरक्षाकर्मी (पीएसओ) फिर्ता गर्न सफल भएको बताएका छन् । उनले नेपाल प्रहरीतर्फ १०७ जना र सशस्त्र प्रहरी बल, नेपालतर्फ १३४ जना गरी जम्मा २४१ सुरक्षाकर्मी फिर्ता बोलाइएको उपलब्धि सार्वजनिक गरेका छन् ।
यस्तै उनले आफ्नो सय दिनमा चार हजार ७९२ जना फरार अभियुक्त पक्राउ परेको बताएका छन् । साथै, यसबाट एक हजार ५५६ वर्ष आठ महिना १६ दिन कैद र ५२ करोड २८ लाख साठ्ठी हजार २३४ रुपैयाँ जरिबाना असुलीका हुनुका साथै न्याय निरुपण र अदालतका फैसला कार्यान्वयनमा महत्वपूर्ण योगदान पुगेको उल्लेख गरेका छन् ।
यीबाहेक राजस्व चुहावट नियन्त्रण गर्नका लागि कार्यक्रम अघि बढाइएको उनले उपलब्धि सार्वजनिक गरेका छन् । पछिल्लो तीन महिनामा सीमाबाट हुने अवैध ओसारपसार नियन्त्रण गर्न सीमा गस्तीलाई व्यापक एवं प्रभावकारी रूपमा परिचालन गरिएको प्रगति विवरणमा उल्लेख छ । यसबाट तीन महिनामा जम्मा नेपाल प्रहरीले एक अर्ब ४३ करोड ९७ लाख ५८ हजार बराबरको र सशस्त्र प्रहरी बल नेपालले ४७ करोड ८७ लाख ७९ हजार ५०० गरी कुल एक अर्ब ९१ करोड ८५ लाख ३७ हजार ६ सय बराबरको सामान भन्सार कार्यालय र राजस्व अनुसन्धान कार्यालयमा बुझाइएको उल्लेख छ ।
लामिछानेले नीतिगत तथा कानुनी प्रबन्ध क्षेत्रमा २२ बुँदा, शान्ति सुरक्षा तथा अपराध नियन्त्रण क्षेत्रमा १४ बुँदा, सीमा तथा अध्यागमन प्रशासनमा ७ बुँदा, विभागीय तथा मातहतका निकायमा निर्देशन र कार्य सम्पादनमा सहजीकरण क्षेत्रमा ८ बुँदा, राजश्व चुहावट नियन्त्रण क्षेत्रमा तीन बुँदा, सूचना प्रविधिको प्रयोगमा पाँच बुँदा, विविध भनेर १९ वटा बुँदा समेटेका छन् ।