काठमाडौं । नेपाली कांग्रेसका सभापति शेरबहादुर देउवाले केन्द्रीय कार्य सम्पादन समितिको बैठक बोलाएका छन् । आज (शनिबार) दिउँसो २ बजे पार्टी कार्यालय सानेपामा बस्ने गरी कार्यसम्पादन समितिको बैठक बोलाइएको कांग्रेस मुख्यसचिव कृष्णप्रसाद पौडेलले जानकारी दिए ।
एमाले अध्यक्ष केपी शर्मा ओली नेतृत्वको सरकारमा सहभागी हुने मन्त्रीको टुङ्गो लगाउनेलगायत अन्य समसामयिक राजनीतिक परिस्थतिबारे बैठकमा छलफल हुनेछ । शुक्रबार माओवादी केन्द्रका अध्यक्ष पुष्पकमल दाहाल ‘प्रचण्ड’ प्रधानमन्त्रीबाट पदमुक्त भएसँगै एमाले अध्यक्ष ओलीलाई प्रधानमन्त्री नियुक्त गर्न राष्ट्रपति रामचन्द्र पौडेलसमक्ष दाबी पेस भइसकेको छ ।
राष्ट्रपति पौडेलले आइतबारसम्मको समय दिएर संविधानको धारा ७६(२) अनुसार प्रधानमन्त्री दाबी गर्न आह्वान गरेपनि कांग्रेस सभापति देउवा र एमाले अध्यक्ष ओलीले शुक्रबार बेलुका नै दाबी पेस गरेका थिए । कांग्रेस र एमालेबीच असार १७ गते राति दुई दलको सरकार बनाउने र पहिले ओली प्रधानमन्त्री बन्ने सहमति भएको थियो । कांग्रेसले ओली नेतृत्वको सरकारमा जाने मन्त्रीहरूबारे छलफल गर्न बैठक बोलाएको हो ।
क–कसको छ सम्भावना ?
नयाँ सरकार गठन प्रक्रियाअघि बढ्ने भएकाले सरकारमा पठाउनेको नामावली बनाउने गृहकार्यमा कांग्रेस सभापति देउवा जुटेका हुन् । कांग्रेस सांसदहरू सभापति देउवा निवास बूढानीलकण्ठ पुगेर मन्त्रीका लागि तीव्र लबिङ गरिरहेका छन् ।
कांग्रेसबाट नेतृत्व गर्दै गृह मन्त्रालय लिएर सरकारमा जानेमा प्रमुख सचेतक समेत रहेका रमेश लेखकको सम्भावना बलियो छ । देउवा निकट स्रोतका अनुसार लेखककै नेतृत्वमा सरकारमा कांग्रेसका नेताहरू सहभागी हुँदै छन् । त्यसोत आकांक्षीका रूपमा उपप्रधानमन्त्री पाए भने सरकारको नेतृत्व गरेर पूर्व महामन्त्री कृष्णप्रसाद सिटौला र पूर्व उपसभापति प्रकाशमान सिंह पनि जाने तयारीमा छन् ।
महामन्त्री गगन थापाले नेतृत्व गरेर सरकारमा जाने विषय पनि कांग्रेसभित्र उत्तिकै चर्चामा छ । यदि उनि आफू पछि हटे भने सांसद प्रदीप पौडेललाई मन्त्री बन्न बाटो खुल्ने छ । कांग्रेसमा संस्थापन समूहबाट डा. आरजु राणा देउवा, रामहरि खतिवडा, कान्तिका सेजुवाल, उदयशमशेर जबरा, किशोरसिंह राठोर, शंकर भण्डारी, अजय चौरासिया, विनोद चौधरी र श्याम घिमिरे मन्त्रीका आकांक्षी छन् ।
शेखर–गगन पक्षबाट भने जीवन परियार, चन्द्र भण्डारी, अर्जुन नरसिंह केसी, हृदयराम थानी, सरिता प्रसाईं, मुक्ताकुमारी यादव आकांक्षी छन्। डा. शशांक कोइराला समूहबाट दीपक गिरी र दीपक खड्का आकांक्षी छन्।