झापा । झापाको अर्जुनधारामा एक १६ वर्षीया नाबालिकालाई ७ जनाले सामुहिक बलात्कार गरेको तथ्य सार्वजनिक भएको छ। शुक्रबार राति अर्जुनधारा–५ की १६ वर्षीया नाबालिकामाथि ७ जनाले सामुहिक बलात्कार गरेका प्रहरीले जनाएको छ। बलात्कृत किशोरीको बयानका आधारमा ६ जना पक्राउ परेका छन् भने एकजना फरार छन्।
किशोरीका अनुसार घटनामा संलग्नमध्ये चिनजानका दुईजनाले उनलाई शुक्रबार साँझ खाजा खान लगेका थिए। अर्जुनधारा–७ स्थित लंका होटलमा खाजा खाएर उनीहरूले साँझपख एकछिन घुम्न जाउँ भन्दै युवतीलाई नयाँ बाख्राहट्टीतिर लिएर गए। त्यस एकान्त ठाउँमा चारजनाले पालैपालो उनीमाथि जबरजस्ती करणी गरेका किशोरीले प्रहरीसमक्ष बयान दिएकी छन्। उनले चारजनासँग प्रतिवाद गर्न नसकेको बयान दिएको प्रहरीले जनाएको छ।
त्यसपछि ती युवतीलाई उनीहरुले लंका होटलमा ल्याएर छोडिदिए। जहाँ लंका होटलका कुक सुदिप श्रेष्ठ र सुजन डाँगी र सोही स्थानका संजिव तामाङले पनि एकान्त ठाउँमा लगेर सामूहिक बलात्कार गरेको प्रहरीले जनाएको छ।
बाख्राहट्टीमा चार जना र त्यसपछि लंका होटलमा अरु तीनजनाले सामूहिक बलात्कार गरेको बयान युवतीले दिएको इलाका प्रहरी कार्यालय बिर्तामोडका डीएसपी प्रकाश विष्टले जानकारी दिएका छन्। पक्राउ परेकाहरुमाथि आइतबार अदालतबाट म्याद थपेर अनुसन्धान भइरहेको उनले जानकारी दिए। प्रहरीले शनिबार बिहानै घटनामा संलग्न चारजनालाई पक्राउ गरेको थियो। पक्राउ पर्नेमा अर्जुनधारा–७ का अनिस लिम्बू, सरोज राई, केशब मगर, सुनिल राजवंशी रहेका छन्। त्यस्तै, दुईजनालाई शनिबार साँझ र राति पक्राउ गरिएको डीएसपी विष्टले जानकारी दिए।
पछि पक्राउ पर्नेहरूमा लंका होटलमा कुकको काम गर्ने सुदिप श्रेष्ठ र सुजन डाँगी रहेका छन्। घटनामा संलग्न अर्जुनधाराकै संजिव तामाङ फरार रहेको प्रहरीले जनाएको छ। प्रहरीले पीडितलाई शारीरिक परीक्षणको लागि प्रादेशिक अस्पताल भद्रपुर पठाएको छ। फरार संजिव तामाङको खोजतलास जारी रहेको जनाइएको छ।