रामेछाप । स्थानिय तहहरूले मनपरि औषधी खरिद गर्दै अनियमितता गर्दै आएको पाईएको छ । सरकारले निःशुल्क रुपमा दिदै आएको मातृ–शिशु स्वास्थ्यमा प्रयोग हुने जीवनरक्षक औषधीहरू महङ्गो तथा फरक–फरक मूल्यमा खरिद गर्दै स्थानिय तहले अनियमितता गर्दै आएका छन् ।
त्यी औषधि मध्ये मिसोप्रोस्टोल, अक्सिटोसिन र म्याग्नेसियम सल्फेट खरिद गर्दा स्थानिय तह अन्तर्गतका स्वास्थ्य शाखाका कर्मचारीहरुले आफूखुसी बढि मूल्यमा खरिद गरेका छन् । प्रदेश सरकारले खरिद गर्दा अक्सिटोसिन इन्जेक्सन ९ रुपैयाँ प्रति गोटा, म्याग्नेसिमय सल्फेट इन्जेक्सन १५ रुपैयाँ प्रति गोटा र मिसोप्रोस्टोल चक्की ३ रुपैयाँ ७५ पैसा प्रति चक्की मूल्यमा खरिद गर्दै आए पनि रामेछापको स्थानियतहहरूले भने चर्को मुल्यमा खरिद गरेको देखाएका छन् ।
यता रामेछाप नगरपालिकाले अक्सिटोसिन इन्जेक्सन गोटाको १२ रुपैयाँ ७५ पैसा मूल्यमा २ सय ५० पिस र म्याग्नेसियम सल्फेट इन्जेक्सन गोटाको ३५ रुपैयाँको दरले १ सय २० वटा टेण्डर विना नै सिधै खरिद गरेको रामेछाप नगरपालिकाका स्वास्थ्य शाखा प्रमुख बिष्णु कार्की बताउँछन । स्वास्थ्य शाखा प्रमुख कार्की भनाईलाई आधार मान्ने हो भने र प्रदेश सरकारले खरिद गरेको मुल्यलाई हेर्ने हो भने सिधासिधा घोटाला गरेको देखिन्छ ।
त्यसैगरी उमाकुण्ड गाउँपालिकाले म्याग्नेसिमय सल्फेट इन्जेक्सन प्रति गोटा १२ रुपैयाँ र अक्सोटोसिन इन्जेक्सन गोटाको ३२ रुपैयाँका दरले खरिद गरेको जनाएको छ । सुनापति गाउँपालिकाले अक्सिटोसिन इन्जेक्सन गोटाको २९ रुपैयाँको दरले खरिद गरेको सुनापति गाउँपालिकका स्वास्थ्य शाखा प्रमुख अर्जुन श्रेष्ठ बताउँछन ।
रामेछाप जिल्लामा भएका ८ वटा स्थानिय तहहरु मध्ये मन्थली नगरपालिका, लिखु तामाकोशी गाउँपालिका, दोरम्वा गाउँपालिका, गोकुलगंगा गाउँपालिका र खाँडादेवी गाउँपालिका भने खरिद विवरण दिन समय लाग्ने भन्दै आलटाल गरेर बसेका छन ।