रामेछाप । रामेछाप नगरपालिका वडा नं. ७ र ८ का नागरिकहरूले सस्तोमा पानी खुवाउनेलाई स्थानिय तहमा भोट दिने बताएका छन् । रामेछाप सामुदायिक खानेपानी तथा सरसफाई उपभोत्ता समितिले वितरण गर्दै आएको पानीको महशुल महङ्गो भएको भन्दै उपभोक्ताले भोट चाहिए पानीको महशुल घटाउन आग्रह गरेका हुन् ।
रामेछाप सामुदायिक खानेपानी तथा सरसफाई उपभोत्ता समितीले नागरिकलाई वितरण गर्दै आएको खानेपानीको महशुल धेरै महङ्गो भएको गुनासो उपभोक्ताहरूले गर्दै आएका थिए । उपभोक्ता समितिले उपभोक्तालाई परेको मर्काको कुनै वास्ता नगरेकोले अब सस्तोमा पानी अनि मात्रै भोटको विकल्प खोजिएको स्थानिय राजन महतारा बताउँछन् । महतारा भन्छन् – ५ सय लिटर पानी पनि आउँदैन । चर्को महशुल मात्र किन तिर्ने । उपभोक्ता समितिले गरेको लापर्बाहीको मारमा हामी पर्यौँ ।
अधिकांस उपभोक्ताहरू महंगोमा पानी किनेर खान बाध्य भएको,धारामा पर्याप्त पानी नआएको,पानीको धारा तथा पाईपहरु विग्रदा पनि समितिले समयमै प्राविधिक मर्मत गर्न नआएको जस्ता गुनासो उपभोक्ताहरूको छ । महिनाको ७ सय तिरेर खानेपानी उपभोग गर्दै आएका नागरीकहरुले केहि महिना यता ५ सयमा खानेपानी उपभोग गर्न पाएपनि त्यो रकम पनि निकै महंगो भएको तुलसा कार्की बताउँछिन ।
सम्भवत नेपालकै महंगो पानी पिउन आफुहरु बाध्य भएको अर्का उपभोक्ता राजु विक्रम बस्नेत बताउछन ।पानीको महशुल घटाउन स्थानिय सरकारले पनि चासो दिनुपर्ने कार्कीको भनाई छ ।
उपभोत्ता समितीका अध्यक्ष गौतम कुमार श्रेष्ठ भने समितिले लिएको यो शुल्क खासै महङ्गो नभएको बताउँछन् । श्रेष्ठ भन्छन – लिफ्ट प्रविधि मार्फत पानी तान्नुपर्ने भएकाले पनि खानेपानीको पैसा महंगो हुन गएको हो । लिफ्ट मार्फत खोलाको पानी तान्दा विजुलीको बिल धेरै चढ्ने भएकाले पनि बाध्य भएर खानेपानीको महसुल घटाउन सकिदैन। समितीले महिनाको ७ सय रुपैयाँ महसुल दिँदै आएकोमा केहि महिना यता २ सय रुपैयाँ घटाएर अहिले महिनाको ५ सय रुपैयाँ लिँदै आएको छ । समाय समयमा बिग्रने सामान तथा मेसिन फेर्नका लागि पनि केहि पैसा जोहो हरेर राख्नै पर्ने हुन्छ । तर नगरपालिका र वडाले सबै खर्च बेहोर्छ भने हामी बिना महशुल पानि दिन तयार छौँ ।
यता रामेछाप नगरपालिकाका नगरप्रमुख नरबहादुर थापा मगर उपभोक्ता समितिले पानीको महशुल घटाउनु पर्ने बताउँछन् । उनि भन्छन् – समितिले खानेपानीको रकम तत्काल घटाएर उपभोत्तालाई सहज बनाउनु पर्छ ।
रामेछाप सामुदायिक खानेपानी तथा सरसफाई उपभोत्ता समितीले रामेछाप नगरपालिका वडा नं ७ र ८ का नागरीकहरुलाई पिउने पानी दिँदै आएको छ । रामेछापका अन्य स्थानका नागरिकहरू पनि लिफ्ट खानेपानीका कारण चर्को मुल्य तिर्न बाध्य छन ।
