रामेछाप । मुख्य निर्वाचन अधिकृतको कार्यालय रामेछापले वैशाख ३० गते हुने स्थानिय तहको निर्वाचनलाई लक्षित गरी कर्मचारी खटाउँदा गम्भिर गल्ती गरेको पाईएको छ । कार्यालयले कर्मचारी खटाउँदा स्थानिय तहमा वडा अध्यक्षका उम्मेदवार वनेका दुई वडा अध्यक्षलाई मतदान अधिकृत र सहायक मतदान अधिकृतको रुपमा काम गर्ने भनि तोकेको हो ।
मतदानमा कर्मचारी भई मतदान केन्द्रमा खटिनेमा मन्थली नगरपालिका–७ भटौलीका देवेन्द्र श्रेष्ठ र लिखु तामाकोशी गाउँपालिका वडा नं. २ सैपुका सन्तोष पौडेल रहेका छन् । श्रेष्ठ र पौडेल दुबै जना नेपाल कम्युनिष्ट पार्टी एमालेको तर्फवाट वडा अध्यक्षको उम्मेदवार हुन् ।
लिखु तामाकोशी गाउँपालिका–२ सैपुमा रहेको अरुणोदय माध्यमिक विद्यालयका प्रधानाध्यापक थिए पौडेल । उनि स्थानिय तहमा लिखु तामाकोशी गाउँपालिका–२ सैपुको वडा अध्यक्षको रुपमा नेकपा एमालेबाट टिकट पाएपछि प्रधानाध्यापकवाट राजिनामा दिएर चुनावी मैदानमा आएका थिए । तर मुख्य निर्वाचन अधिकृतको कार्यालयले यस्ता कुरालाई समेत ध्यान नगरि उनलाई लिखु तामाकोशी गाउँपालिका–६ तिल्पुङ्गमा रहेको नवदर्शन माध्यमिक विद्यालय कटहरे (ग) मतदान केन्द्रको मतदान अधिकृतको रुपमा खटाई दियो ।
यता अर्को वडा अध्यक्षका उम्मेदवार तथा सहायक मतदान अधिकृत भै खटेका देवेन्द्र श्रेष्ठ मन्थली नगरपालिकाको कर्मचारी हुन् । उनले मन्थली नगरपालिका–७ भटौलीमा एमालेबाट वडा अध्यक्ष पदमा टिकट पाएपछि मन्थली नगरपालिकामा राजिनामा दिएर चुनावमा हिमिएका हुन् । उनलाई पनि मन्थली नगरपालिका– ६ भलुवाजोरमा रहेको आधारभूत विद्यालय बेतीनी (क) मतदान केन्द्रको सहायक मतदान अधिकृतको रुपमा खटाईएको छ ।