काठमाडौं । तेह्रथुम, धादिङ, कैलालीमा भएका छुट्टाछुट्टै सवारी दुर्घटनामा तीन जनाको मृत्यु भएको छ ।
तेह्रथुमको म्याङलुङ नगरपालिका–१ डबलीमा बुधबार साँझ ट्याक्टर दुर्घटना हुँदा चालकको मृत्यु भएको छ ।
म्याङलुङबाट तमोरतर्फ जाँदै गरेको प्रदेश १–०२–००३ त ४९८ नम्बरको ट्याक्टर अनियन्त्रित भई दुर्घटना हुँदा तेह्रथुमकै फेदाप गाउँपालिका–५ ईसिबुका २६ वर्षीय रबिन खापुङको मृत्यु भएको हो । ट्याक्टर सडकबाट अन्दाजी १ सय मिटर तल खसेको हो ।
चालक खापुङको घटनास्थलमै मृत्यु भएको जिल्ला प्रहरी कार्यालय तेह्रथुमले जनाएको छ ।
यस्तै, धादिङको धुनिवेशी नगरपालिका–६ चालिसेमा बुधबार राति ट्रकको ठक्करबाट पैदलयात्री महिलाको मृत्यु भएको छ ।
काठमाडौंबाट नारायणगढ तर्फ जाँदै गरेको ना ८ ख ५१७३ नम्बरको ट्रकको ठक्करबाट गोर्खाको गण्डकी गाँउपालिका–५ दरबुङ घर भएकी अन्दाजी ४४ वर्षीया राममाया वि।क।को मृत्यु भएको हो ।
दुर्घटनामा गम्भीर घाइते भएकी वि।क।को उपचारको क्रममा ट्रमा सेन्टरमा मृत्यु भएको हो । ट्रक सहित चालकलाई प्रहरीले नियन्त्रणमा लिएको छ ।
यसैगरी, कैलालीको घोडाघोडी नगरपालिका–२ पाण्डेचोक साडेपानीमा बुधबार राति मोटरसाइकलको ठक्करबाट पैदलयात्री महिलाको मृत्यु भएको छ ।
सुदुर पश्चिम प्रदेश ०१–००८ प ६४०७ नम्बरको मोटरसाइकलले ठक्कर दिँदा स्थानीय ५५ वर्षीय तारा रावलको मृत्यु भएको हो ।
दुर्घटनामा गम्भिर घाइते भएकी रावलको उपचारको क्रममा घोडाघोडी अस्पतालमा मृत्यु भएको हो ।
मोटरसाइकल सहित चालकलाई इलाका प्रहरी कार्यालय सुखड कैलालीले नियन्त्रणमा लिएको छ ।