काशीराम जैसी,
काठमाडौं । लामो समय सम्मको प्रचण्ड गर्मी र खडेरीपछि शनिबार बिहान देखि परेको वर्षाले कैलालीका किसानलाई राहतको अनुभूति भएको छ ।
धान रोप्ने समय भै सकेको भएपनि वर्षा भने भएको थिएन तर बिहानै देखि भएको वर्षाले अब धान रोप्न सहज हुने भएपछि किसान उत्साहित भएका छन् ।
प्रचण्ड गर्मी र कामविहीन भएर बसेका किसानलाई आजको वर्षाले राहत भएको हो । जिल्लाको सबै ठाउँमा आज बिहानैदेखि लगातार वर्षा भइरहेको छ । गर्मी घटाउनसँगै खेत खनजोत गरी अब रोप्न सहज हुने भएपछि आजको वर्षाले किसानले निकै राहतको अनुभूति गरेका छन् ।
जिल्लाभरिकै धेरैजसो खेतीयोग्य जग्गा आकाशे पानीकै भरमा खेती गनुपर्ने अवस्था रहेको छ । बर्षाले किसानलाई यति मात्र नभई लगाएको तरकारी तथा फलफुल सिंचाइमा समेत सहयोग पुर्याएको छ।
पानी परेसँगै किसानले खेतमा धान रोपाई सुरु गर्ने तयारी गरी रहेका छन् । समयमा पानी परेको भए यतिबेला लगभक ५० प्रतिशत रोपाईको काम सकिसकेको हुन्थ्यो, ढिलै भए पनि खेतमा धान रोपाई गर्न पाएको कृषकहरुको भनाई रहेको छ ।
रोपाईको समयमा आकाश ताक्नेका लागि त अमृत वर्षा नै भएको छ भने सबैलाई शीतलताको अनुभूति भएको छ ।