धनगढीः प्रधानमन्त्री शेरबहादुर देउवाले सत्तारुढ गठबन्धनलाई १५ वर्षसम्म कायम राख्ने इच्छा भएको बताएका छन्।
बिहीबार सत्तारुढ गठबन्धनले डडेल्धुरामा आयोजना गरेको चुनावी सभालाई सम्बोधन गर्दै देउवाले ओलीका असंवैधानिक कदम रोक्न बाध्यात्मक परस्थितिमा गठबन्धन बनेको उल्लेख गर्दैै १५ वर्षसम्म कायम गर्ने इच्छा व्यक्त गरेका हुन्। ‘हामीले केपी ओलीका असंवैधानिक कदम रोक्न बाध्यात्मक परस्थितिमा गठबन्धन गरेका थियौँ। संविधानको रक्षाका निमित्त गठबन्धनलाई १०–१५ वर्षसम्म लैजाने इच्छा छ, ’ देउवाले भने। उनले ओलीले राष्ट्रपति भण्डारीलाई रातिको २ बजे उठाएर संसद भंग गरेको बताउँदै सबैको आग्रहमा प्रधानमन्त्री भएको जनाए।
छिमेकी मुलुक चीन र भारतसँग लडेर नसकिने भएकाले मित्रता कायम गरेर अघि बढनुको विकल्प नभएको उनको भनाई थियो। देउवाले राष्ट्रिय गौरवको पश्चिम सेती परियोजना निर्माणको काम अघि बढिसकेको दाबी गर्दै डडेल्धुराको विकासका लागि प्रतिबद्ध रहेको बताए। डडेल्धुरालाई पर्यटकीय हवका रुपमा विकास गर्न मुख्य राजमार्गलाई चार लेनको बनाउने, परशुरामबाट भारत आउँँजाउ गर्ने आधिकारिक नाका खोल्ने जस्ता काम गर्ने योजना रहेको उनले सुनाएका छन्।