काभ्रेपलाञ्चोक । काभ्रेपलाञ्चोक जिल्लाका चारवटै प्रदेशसभामा वाम–लोकतान्त्रिक गठबन्धनका उमेदवार विजयी भएका छन् ।
प्रतिनिधिसभा १ अन्तर्गत प्रदेशसभा ‘क’मा सत्ता गठबन्धनका तर्फबाट नेकपा (माओवादी केन्द्र)का उमेदवार रत्नप्रसाद ढकाल विजयी भएका छन् । ढकालले २० हजार ७२० मत प्राप्त गरे भने निकटतम प्रतिस्पर्धी नेकपा (एमाले)का दिलबहादुर तामाङले ११ हजार २७८ मत प्राप्त गरे ।
यस्तै, सोही प्रतिनिधिसभा क्षेत्रको प्रदेशसभा ‘ख’ मा गठबन्धनका उमेदवार नेपाली कांग्रेसका तीर्थ लामा तीन मतान्तरले विजयी भएका छन् । उनले १९ हजार २८० मतसहित जित हासिल गरे भने उनका प्रतिस्पर्धी एमालेका चन्द्र लामाले १९ हजार २७७ मत प्राप्त गरे ।
यसैगरी, प्रतिनिधिसभा २ नम्बर प्रदेशसभा ‘क’ मा गठबन्धनका उमेदवार (एकीकृत समाजवादी)का लक्ष्मण लम्सालले १९ हजार ४०८ मत प्राप्त गरे । मुख्य प्रतिस्पर्धी एमालेका कुमार खकुरेलले १९ हजार २२० मत प्राप्त गरे ।
सोही निर्वाचन क्षेत्रअन्तर्गत प्रदेशसभा ‘ख’ मा कांग्रेसका कञ्चनचन्द्र वादे श्रेष्ठ विजयी भएका छन् । श्रेष्ठले २६ हजार ३५ मत प्राप्त गरे भने एमालेका कुमार थापाले २१ हजार ९५७ मत प्राप्त गरे ।
प्रतिनिधिसभा–१ प्रदेशसभा ‘क’बाट निर्वाचित ढकाल र प्रतिनिधिसभा–२ प्रदेशसभा ‘क’बाट निर्वाचित लम्साल यसअघि पनि वाग्मती प्रदेशसभाको सदस्य थिए । ढकाल प्रदेशको युवा तथा खेलकुद मन्त्री समेत हुन् । जिल्लामा एक लाख ८६ हजार ९३५ जनाले मतदान गरेका थिए ।