काठमाडौं ।नेपालका राजनितिक दलहरूको दबदबालाई तोड्दै काठमाडौं महानगरपालिकाको मेयरमा र्यापर बालेन्द्र साह ‘बालेन’ विजयी भएका छन् ।
स्वतन्त्र उम्मेदवार साहले नेपाली कांग्रेसको उम्मेदवार सिर्जना सिंह र नेपाल कम्युनिष्ट पार्टी एमालेका केशव स्थापितलाई हराउँदै मेयरमा विजयी भएका हुन् ।
बालेनले ६१ हजार ७६७ मत ल्याएका हुन् । उनका निकटतम प्रतिद्वन्द्वी कांग्रेसकी सिंहले ३८ हजार ३४१ मत ल्याइन् । स्थापितले ३८ हजार ११७ मत ल्याए । साहले सिंहको भन्दा २३ हजार ४२६ मत बढी पाएका छन् ।
त्यस्तै काठमाण्डौ महानगरको उपमेयरमा एमालेकी सुनिता डंगोल निर्वाचित भइन् । उनले नेकपा एसका रामेश्वर श्रेष्ठलाई फराकिलो मत अन्तरमा पराजित गर्दै उपमेयरमा विजयी भएकी हुन् । डंगोलले ६८ हजार ६१२ मत ल्याइन् । श्रेष्ठले २३ हजार ८०६ मत ल्याएको निर्वाचन आयोगले जनाएको छ ।
स्थानीय तह निर्वाचन अन्तर्गत काठमाडौं महानगरपालिकामा एक लाख ९० हजार नौ सय ६२ मत खसेकोमा सात हजार ६ सय मत बदर भएका छन् ।