रामेछाप । प्रतिनिधिसभा र प्रदेशसभाको मङ्सिर ४ गते निर्वाचन हुँदैछ तर मतदातामा भने खासै उत्साह छैन । प्रत्येक निर्वाचनमा नेताहरु घर दैलोमा आउने, भोट माग्ने र जाने तर जिताएर पठाएपछि नागरिकको समस्या नबुझ्ने हुँदा नागरिकमा निराशा छाएको हो ।
अहिले विभिन्न टोल बस्तीमा होस् वा चोक चौतारीमा नागरिकको छलफल र चर्चाको विषय चुनाव बनेको छ । यतिबेला उम्मेदवारहरु मतदाता फकाउन घरदैलोमा पुग्न थालिसकेका छन् । तर उनीहरुसँग ठोस योजना छैन । नागरिकलाई पनि घरदैलोमा नेताहले अपेक्षा गरे जस्तो भेट्न सकेका छैनन् । वडा वडामा भेटघाट कार्यक्रम राजनीतिक दलले राखेका छन् तर पनि खासै नागरिकको सहभागिता देखिएको छैन ।
अर्को तर्फ मतदाता पनि चुनावलाई लिएर खासै उत्साही देखिएका छैनन् । हरेक निर्वाचनमा भोट माग्न आएका उम्मेदवारले आश्वासन दिएपनि चुनाव जितेपछि कुनै पनि जनप्रतिनिधिले आफ्नो माग पुरा नगरेको रामेछापका स्थानीयहरुले बताएका छन् । देशमा लोकतन्त्र, प्रजातन्त्रका लागि धेरै आन्दोलन भए । सबै आन्दोलनमा जनताले बलिदान नै दिए । तर त्यसको खासै उपलब्धी भने नभएको रामेछापका नागरिकहरुको भनाई छ ।
अहिले नेताहरुले निर्वाचनलाई व्यक्ति मोटाउने अवसरका रुपमा मात्र लिएको मतदाताको गुनासो छ । निर्वाचनको बेला अत्यधिक खर्च गर्ने प्रवृति बढ्दै गएको छ । यसका कारण निर्वाचित भइसकेपछि घोषणा पत्र कार्यान्वयन भन्दा निर्वाचन खर्च उठाउनेतर्फ ध्यान केन्द्रित गर्ने प्रवृति पनि बढ्दै गएको छ । यस्तो प्रवृतिका कारण पछिल्लो समय मतदाताहरुले नो भोटको अधिकार हुनुपर्ने माग गरिरहेका छन् । तर अहिलेको समयमा निर्वाचनमा मताधिकार प्रयोग गरि खराब मध्येबाट कम खराब व्यक्ति छान्नुको अर्को विकल्प नभएको राजनीतिक जानकारहरु बताउँछन् ।
गोकुलगंगा गाउँपालिका वडा नम्बर १ चुचुरे निवासी हर्कबहादुर खड्कामा पनि निराशा छाएको छ । उनले भने २०४६ साल यता प्रत्येक निर्वाचनमा नेताहरु आउछन्, भोट माग्छन्, भोट हालेर जिताएर पठायो तर र्फकेर नेता गाउँ आउदैनन् । चुनाब आउछ नेता आउछ भोट दिएर पठायो फर्केर आउदैन । किन अब भोट हाल्ने अब नेतका आफ्ना आफन्तलाई जागिर खुवाउन र धनी बनाउन हो र उनले प्रश्न गरे ।
चुनाबको समयमा सबैले चिन्छन् बोलाउछ तर आफ्नो कुनै समस्या लिएर गयो भने चिन्दैनन् । त्यस्तै गरी बीरबहादुर तामाङले भने के के नि पाउछु भनेर झण्डा बोकेर हिड्यो दाजुभाइ बीच लडाई ग¥यो आखिरीमा चुनाबपछि चिनिन भन्छ । फोन ग¥यो फोन उठ्दैन अनि के का लागि हामी नेताको पछि लाग्ने, किन भोट हाल्ने रु अब त हामीहरु भोट हाल्न समेत जान चाहदैनौं । भोट हाल्न दिन भरी लाइन बसेर हाल्यो, के हुने केहि हुन्न । बिकास भयो भनौ जस्ताको त्यस्तै छ । नेता मोटाएको छ त्यति हो अरु केहि भएको छैन । हामी नागरिकलाई गणतन्त्र आएपनि प्रजातन्त्र आएपनि लोकतन्त्र आएपनि हुने केहि हैन हुने नेतालाई मात्र हो ।
यो उदाहरण मात्र हो । रामेछापका नागरिकमा यतिबेला निराशा छाएको छ । नेता गाउँ बस्ती गएका छन् तर नागरिकलाई भेट्न सकेका छैनन् । नागरिक निर्वाचन भन्दा अहिले आफ्नो दैनिकी काम तिर ब्यस्त छन् । नेता र कार्यकर्तामा निराशा छाएको छ ।